Daeth criw o bobl ynghyd i drafod sefydlu'r Clwb Dringo, un ohonynt oedd Showell Styles, awdur a mynyddwr adnabyddus. O ganlyniad i'r drafodaeth cynhaliwyd y cyfarfod cyntaf yng Nghwt y Sgowtiaid ar 25 ain Chwefror 1953 , lle roedd deg o bobl yn bresennol.Enwir y rhain sef sefydlwyr y clwb yn y llyfr cofnodion fel:

Showell Styles
G. E. Owen
E Lloyd Evans
W. M Richards
D. E Humphreys
Iorwerth Jones
Herbert Jones
Dewi Jones
Glyn Jones
James Roberts

Yn y dyddiau cynnar pan edrychwyd ar fynydda fel diddordeb peryglus , anghyfrifol mae'n galonogol i nodi mai pobl leol a pharchus yn y gymdeithas oedd yn y cyfarfod cyntaf ac nid y math o berson y disgwylid iddo ymddwyn yn anghyfrifol trwy ddringo mynyddoedd!

Yn dilyn y cyfarfod cyntaf cynhaliwyd cyfarfod cyffredinol ar 19 fed Mawrth , 1953 yng Nghlwb y Merched ( Stryd yr Wyddfa?) . Etholwyd y pwyllgor sef : Miss G. Thomas, Miss J Humphries, W.M . Richards, David E. Humphreys , H. Jones, ac R.W Trumper.Penderfynwyd ar reolau i'r clwb a phenwyd tâl aelodaeth o 5/- i oedolion a 2/6 i blant.Cafodd y clwb ei enwi yn Clwb Dringo Porthmadog ( fel yr awgrymwyd gan Dewi Jones, sydd ar y pwyllgor o hyd )

Heddiw mae Clwb Dringo Pothmadog yn parhau i fod yn weithgar yn cynnig rhaglen lawn o deithiau mynydda a chyfarfodydd o dan do.Trefnir rhaglen o deithiau cerdded a dringo yn Eryri bob pythefnos dan arweiniad aelodau profiadol y clwb. Mae'r teithiau hyn yn amrywio o fod yn deithiau hamddenol ar lefel isel i deithiau ar lefel uchel , sy'n cynnwys dringo creigiau , sgramblo a dringo ar rew ac eira.

Mae manteision cerdded hamddenol yn amlwg, ac yn llawer gwell nag ymarfer mewn campfa. Mae'r rhan fwyaf o bobl sy'n ymarfer mewn campfa yn ei gweld yn anodd i barhau am gyfnod hir tra mae pobl sy'n cymryd rhan mewn gweithgareddau mynydda yn aml yn parhau i fynydda yn eu henoed.

Yn y gaeaf cynhelir nosweithiau misol lle gwahoddir siaradwyr i sgwrsio ar fynydda. Mae gan y clwb lyfrgell o lyfrau mynydda , llyfrau dringo a mapiau sydd ar gael i aelodau ar fenthyg.

Croesewir aelodau newydd i'r clwb ac hefyd mae croeso i bobl sy'n ymweld â'r ardal i ymuno â'r teithiau. Am fanylion ar sut i ymaelodi neu os oes gennych ddiddordeb mewn ymuno ar unrhyw daith cliciwch ar un o'r botymau cyswllt isod.